BLOG DE 1º E 2º CURSOS DO CEIP PLURILINGÜE A PEDRA DE BUEU

BLOG DO 1º E 2º CURSOS DO CEIP PLURILINGÜE A PEDRA DE BUEU

viernes, 19 de junio de 2015

DESPEDIDAS CON ARTE!

E por fin chegou o último día do curso! Parece que hai pouquiño que comezamos pero xa pasou o tempo e traballamos tanto.... que xa nos merecemos un descanso!
Hoxe invitáronnos os compañeiros de 3ºA a ver dúas representacións teatrais: O ESPANTALLO AMIGO (a partir dun libro que leron ao longo do curso) e  A ÚLTIMA CEA (representando o cadro de Leonardo da Vinci) Fixérono xenial!
Despois xogamos un ratiño no patio e merendamos todos xuntos na aula de 1º A compartindo cos compañeiros un montón de doces e lambetadas. Mmmm!
Finalmente, no patio dos maiores, asistimos á entrega de premios dos concursos celebrados ao longo do curso, entre eles o organizado polo Día das Letras Galegas:  Que sabes de Xosé Filgueira Valverde? onde resultaron premiados: Álvaro, Lara e Paola de 1º e Miguel, Aitana e... de 2º
Finalmente todos volvimos ás aulas para despedirnos ata o ano e tamén da PROFE CARMEN, que despois de moitos anos de traballo, tócalle darse un descanso e gozar dunha vida máis tranquila.
Ata sempre!

jueves, 18 de junio de 2015

ÚLTIMA SAÍDA DO CURSO

Hoxe fomos de excursión. Foi a nosa última saída do curso e para os de 2º a última saída do ciclo, xa que despois do verán comezarán unha nova etapa escolar en 3º curso, cambiando de aulas e de profesoras. 
Por iso, quixemos ir xuntos a visitar unha obra de arte natural do noso entorno: CABO UDRA, pero antes todos tiñamos unha tarefa pendente.
O alumnado de 1º foi visitar a CAPELA DOS SANTOS REIS, onde nos agardaba o profe ARTURO, quen nos fixo de guía e explicounos marabillosamente a orixe e valor artístico desta capela deseñada por URBANO LUGRÍS. Acompañábano 3 membros da asociación de amigos da Capela e tamén nos explicaron cousas interesantes. Ao rematar, debuxamos a capela nunha libretiña que nos deron as profes.
Namentres, o alumnado de 2º foi á CASA MUSEO DA MANGALLONA en Coiro, de Camilo Camaño Xestido, onde lles atenderon estupendamente.
Finalmente xuntámonos todos en Cabo Udra, pero como facía tantísima calor cambianos de plans e fomos á praia da Mourisca, onde merendamos e xogamos na area á sombra e preto da brisa mariña.
Pasamos unha mañá estupenda!
Ata pronto compañeiros, boa sorte na vosa nova etapa!

miércoles, 17 de junio de 2015

ESCENIFICACIÓN DUN CADRO DE KANDINSKY

Hoxe o alumnado de 1º escenificou unha obra de arte: CÍRCULOS CONCÉNTRICOS de KANDINSKY. Este traballo foi o remate dun curso cheo de arte, e este foi o cadro no que nos baseamos para facer os obradoiros de Nadal, os disfraces de Entroido e o teatro de fin de curso.
Durante moito tempo preparamos esta obra de teatro, que foi unha idea orixinal da profe Geli e que pouco a pouco fomos construíndo entre todos.
Ao final, o resultado foi óptimo, o alumnado actuou de marabilla e gustou moito a todos os espectadores.
Agradecemos a colaboración das familias para facer posible este espectáculo e, en especial, do pai de Ana Mayo quen grabou e editou o vídeo e fotografiou algunhas esceas.
GRAZAS!


E aquí tendes as fotos:



Ao chegar ao cole, estábanos esperando unha exhibición de taekwondo na que participaba alumnado do noso colexio.


E aínda tivemos tempo de facer un KANDINSKY por equipos con plastilina.


martes, 16 de junio de 2015

LA LISTA DE...

Durante este trimestre, na materia de LINGUA CASTELÁ, lemos un libro chamado LA LISTA DE CUMPLEAÑOS de Anna Manso e ilustrado por Gabriel Salvadó.
Foi un libro divertido que nos encantou a todos e que levamos para as casas para lelo sempre que queiramos. O que nos quixo ensinar a autora a través desta pequena novela foi a facer LISTAS. Contounos que a súa lista preferida é a dos contos que leu de pequena e invitounos a escribir a nosa lista para poder engadir o seu libro. Seguro que o faremos!
Pero ademais, nós quixemos facer outra lista relacionada co noso proxecto LER ARTE, e o que fixemos foi escribir en cada aula de 1º unha lista coa nosa OBRA DE ARTE preferida.
Mirade que listas tan artísticas!









lunes, 15 de junio de 2015

O OGROCHO

Hoxe fomos ao Centro Social para ver unha representación teatral que nos ofreceu o Concello de Bueu chamada: O OGROCHO, de Suzanne Lebeau. 
Trataba dun rapaz diferente aos demais e de como a súa forza de vontade conseguía superar os obstáculos que o separaban dos seus semellantes. 
Os actores María Salgueiro e Lois Soaxe, da compañía "Teatro de ningures" estiveron fantásticos, e déronnos moitas ideas para facer mellor o noso papel na obra de teatro que representaremos o mércores.
Aínda que pasamos un chisquiño de medo, en xeral gustounos a obra e aprendemos moito.
Ata a próxima!



sábado, 13 de junio de 2015

SAÍDA DE FIN DE CURSO: VIGO-SOUTOMAIOR

O martes 2 de xuño, o alumnado de 1º e 2º fomos de excursión. 
Pola mañá visitamos NATURNOVA, en Vigo. Alí fixemos unha visita interactiva por todas as salas onde aprendemos moitas cousas sobre as ciencias e despois fixemos un obradoiro artístico no que observamos detidamente distintas obras de arte de autores galegos (había unha de Lugrís!) e buscamos sentido a unha obra que coloreamos cada un imaxinando o que podía ser (un peixe, unha cebra, un porco, un grilo...) 
Ao saír do museo fomos no bus ata o peirao de Arcade, onde hai unha carballeira cun merendeiro, onde tomamos o xantar, xogamos e descansamos un pouquiño. Despois de comer, deixáronnos xogar nun parque chulísimo e volvemos montar no bus para subir ao CASTELO DE SOUTOMAIOR
Alí, atopámonos unha sorpresa: había un equipo de cine grabando escenas para unha película! Tivemos a ocasión de ver desde as galerías do castelo un anaco da grabación dunha loita de gladiadores romanos, foi espectacular!!! e logo visitamos o castelo, observando as salas, os recunchos, o mirador e... o calabozo! 
Máis tarde, paseamos polos xardíns do castelo e vimos moitas árbores diferentes, ata había unha sequoia! Bebimos auga nunha fonte e partimos cara a Bueu cun pouquiño de retraso... 
Xa queda pouco para a seguinte saída!

LinkWithin

Related Posts Plugin for WordPress, Blogger...